袂擱離開啊～

昨暝我夢見阮媽媽，
我佇我的房間內，伊雄雄佮我的房間門拍開。

伊穿一領紅甲若火的連身裙，親像神明咧穿的彼種。
我看伊入門，隨走過共攬落。

我詳細看伊的面，佮以早仝款，小可啊有皺紋，擱有一寡斑。
這真正是你，我的媽媽。

我攬著伊哭，叫伊莫走。

伊嘛共我攬咧，共我講：我袂擱離開啊。



夢到這，我隨醒起來。
攑頭起來看，門口啥物攏無。